Адам жанына араша түсіп, шықпас жанға себепші болу - ақ халаттылардың Алла алдындағы да, адам алдындағы да міндетті борышы. Бұл салаға бетбұрыс жасаған біздер дәрігерлік қызметтің, соның ішінде ауылдық жерде дә рігер болудың ауырлығы мен қызығын бастан өткізіп келеміз. Тоқырау жылдарында не бір қиыншылықтарды еңсердік. Ауруханамыз жабылып, барлық қызметкерлеріміз қысқартулар ға ұшырап, амбулатория болдық. Амбулаторияда 1 дәрігер, 1 медбике ғана қалып, өзіміз тазалықшы, өзіміз қарауыл, өзіміз от жағушы да болдық. Сондай қиыншылықтарға қарамастан, халықтан қолдан келген көмегімізді аямадық. Күн-түн демей медициналық көмек көрсеттік. Президентіміз Н. Ә. Назарбаевтың көрегендігінің арқасында денсаулық саласына көп көңіл бөлініп, барлық ауылдық жерлердегі ауруханалар мен амбулаториялар қайта құрылып, жаңа бағытта жұмыс жасай бастады. Қазіргі кезде «Тоқабай»дәрігерлік амбулаториясында 1 дәрігер, 1 фельдшер, 1 акушерка, 5 медбике, 2 тазалықшы, 1 санитарлық көлік жүргізушісі, 1 от жағушы жұмыс істесе, осы амбулаторияға қарасты «Жіңішкеқұм»МАП-ында 1 фельдшер, 1 тазалықшы, 1 санитарлық көлік жүргізушісі, 1 от жағушы, «Атанши»медпунктінде 1 фельдшер, «Мойнақ»медпунктінде 1 фельдшер қызмет атқарады. Бұл ретте, ауыл халқына медициналық көмек көрсету жақсаруда дегіміз келеді. Амбулаториямызда 9 керуеттік күндізгі стационар жұмыс істейді. «Д» есепте тұрған ауруларымыз қажетті тегін дәрілермен қамтамасыз етілген. Екіқабат әйелдер мен 5 жасқа дейінгі балаларға күнделікті патронаж жұмыстарын жүргізу, аурудың алдын алу профилактикалық іс-шаралары, халықтың нысаналы топтарын скринингтік тексерілуден өткізу бүгінгі медицина қызметкерлерінің басты міндеттері болып саналады. Көп жағдайда ауылдық жердегі қызмет етіп жатырған мамандардың жұмыстары елене бермейді. Енді қазір біздің медицина саласында істеген жұмыстарымыз саралана бастады. Сол бойынша қосымша ақы төленуде. Мақтанғаным емес, соңғы 10 жыл көлемінде «Тоқабай»дәрігерлік емханасында ешқандай бала өлімі болған емес. Бұл-жалғыз менің ғана емес, амбулатория қызметкерлерінің де үлкен жетістігі. Орта буын медицина қызметкерлері үнемі өздерінің білімдерін арттырып, біліктіліктерін жетілдірумен қатар, алдарына келген науқастарға жылы сөздерімен, шипалы емдерімен тез сауығып кетулеріне қалтқысыз қызмет етуде. Халыққа көрсеткен қызметім еленбей қалып жатырған жоқ, бірнеше рет аудан әкімінің «Алғыс хаттарын», облыстық, аудандық денсаулық сақтау бөлімінің кәсіподақ ұйымының «мақтау қағаздарын», 2003 жылы Денсаулық сақтау министрлігінің «Алғыс хатын»алдым. Мұның бәрі де халыққа көрсеткен адал қызметтерімнің лайықты нәтижесі деп білемін. Тәуелсіздік алғалы 25 жыл да талай қиындықтардан сүрінбей, халыққа адал қызмет ете білген «Тоқабай»дәрігерлік амбулаториясының ұжымы алдағы 2016-2019 жылдарға арналған «Денсаулық» бағдарламасында да жақсы жетістіктерге жетеді деп сенім білдіремін.

М. СЕРМАҒАНБЕТОВА,

«Тоқабай» дәрігерлік амбулаториясының аға дәрігері