Антқа адалдық - мықты денсаулық
Ауылдағылардың биылғы тартуы - жаңа аурухана
Атап айтар болсақ, Арал аудандық денсаулық сақтау саласы бойынша биылғы жылдың 9 қаңтар күні облыс әкімінің шешімімен аудандық орталық аурухана мен аудандық емхана барлық құрылымдық мекемелерімен біріктіріліп амбулаториялық емханалық қызметі бар Арал аудандық орталық ауруханасы шаруашылық жүргізу құқығындағы мемлекеттік коммуналдық кәсіпорын болып қайта құрылуы игілікті істердің бастауы болды.
Сонымен қатар, аудандағы емдеу, алдын алу мекемелерінің материалдық-техникалық базасын нығайтуда біршама істер атқарылуда. 2013 жылы Қарақұм дәрігерлік амбулаториясы, 10 төсектік Қамыстыбас ауылдық ауруханасы ашылса, 2014 жылы Қамыстыбас, Аралқұм дәрігерлік амбулаториялары салынып, халыққа қызмет көрсетуге кірісіп кетті. Осы жылы Сексеуіл ауылдық емханасы, 2015 жылы 40 төсектік Сексеуіл ауылдық ауруханасы, Бекбауыл, Шижаға, Аманөткел, Қаратерең дәрігерлік амбулаториялары салынады-деп жоспарлануда екен.
Алайда, қазіргі қаржы тапшылығына байланысты іске асырылуы қалай болар екен? - деген сауалымызға мамандар, жоба-сметалық құжаттары әзірленіп, нақтыланып қойылғанын жеткізді.
Қазіргі таңда аудандық перзентхана 112 млн теңгеге күрделі жөндеуден өткізілуде. "Жол картасы” бойынша аудандық перзентханада ана мен балаға медициналық көмекті жақсарту мақсатында тәулік бойы реанимациялық кезекшілік жұмыс істейтін болыпты.
Аурухананың мәселесін құрал-жабдықтар шешеді
Осы жылы орталық аурухана облыстық бюджеттен бөлінген 107 млн теңге қаржыға заманауи медициналық жабдықтар мен ультрадыбыстық диагностикалық сараптау аппараттары, эндоскопиялық жабдық, жаңа туылған балалар үшін реанимация жүйелері, өкпені жасанды желдету, ингаляциялық наркоз аппараттарымен қамтамасыз етілмек.
Заман талабына сай аудан тұрғындары диагностика мен емдеудің иннновациялық мобилдік технологиялары, яғни жылжымалы медициналық кешен, санитарлық авиация, телемедицина арқылы мамандандырылған медициналық қызметін кеңінен пайдалануда. Кешенде 9 дәрігер маман Арал, Қазалы аудандарының тұрғындарына барынша қызмет етуде. Қазірдің өзінде соңғы үлгідегі әдістермен 11 мыңнан астам тұрғын тексеріліп, 2 мыңның үстінде науқас алғаш рет анықталып, емдеу-сауықтыру шараларының нәтижесінде 62 пайызы сауықтырылған.
Мәселен, санавиацияға биыл 16 шақырту, 7 ауыр босанушы әйел, 9 ауыр жағдайдағы нәресте тіркеліпті. Телемедициналық кеңес беру бойынша биылғы жылы 36 әртүрлі ауыр науқастарға облыстық медицина орталығының мамандарынан тиісті кеңестер алынып, оң нәтижесін бергендігі аудандық денсаулық сақтау саласының жетістігі болар.
Аралда да оталар ОМО-тан кем жасалмайды
Инновациялық даму бағытында 2013 жылы аудандардың алғашқысы болып 18 млн теңгеге лизинг тәсілімен эндовидеохирургиялық кешен алынып, биыл тек осы тәсілмен 141 ота жасалған.
Жалпы, Арал ауданының хирург дәрігерлері өте мықты екендігі көп айтылады. Содан болар, орталық аурухананың хирургия бөлімшесінде облыс деңгейінде жасалатын струмэктомия, аденомектомия, нефроэктомия, асқазан резекциясы, бүйрек пластикалық оталары, бас сүйек трапенациясы, сүйек остеосинтездері кең көлемде жасалуда екен.
Күндізгі стационарға басымдық берілуде
Бірыңғай Ұлттық денсаулық жүйесі негізінде мұнда да тәулік бойы жұмыс жасайтын стационарлардағы төсек қоры оңтайландырылуда.
Орталық ауруханада 50 төсектік күндізгі стационар қызмет көрсетеді. Амбулаториялық-емханалық көмек көрсететін құрылымдарда 2013 жылы 150-ден астам күндізгі төсек болса, қазір оның саны артып отыр. Алдағы уақытта да күндізгі стационарлардың төсек қорын көбейту жалғасын таба береді. Үстіміздегі жылдың 6 айында күндізгі стационарда 2 мыңға тарта науқас ем қабылдаған.
Сондай-ақ, халықтың нысаналы топтарын профилактикалық-медициналық тексеруден өткізу жұмыстары тиісті деңгейде жүргізілуде. Қан айналым жүйесінің ауруларын тексеруге жоспарланған науқастардың 52 пайызы, су қараңғы ауруы бойынша 58 пайызы, сүт безі қатерлі ісігі бойынша 54 пайызы, жатыр мойны ісігі 43 пайыз, тоқ-тік ішек қатерлі ісігі жоспары 50 пайызға, өңеш-асқазан қатерлі ісігі 49 пайызға қуық асты безі қатерлі ісігі 59 пайызға тексеріліп, скринингтік тексеру кезінде анықталған аурулар мен қауіп-қатер факторлары бойынша емдеу-сауықтыру жұмыстары атқарылу кезеңінде.
Қорыта айтқанда, аудандық аурухана мен аудандық емхана біріктіріліп, 1200 жұмысшы қызметкерлері бар бірыңғай кәсіпорын болғалы аудан халқының медициналық көмекке деген қолжетімділігі бұрынғыдан да артып, науқастар уақытылы әрі сапалы емдеу диагностикалық және мамандандырылған көмекке қол жеткізуде.
Емдеу мекемелерінің саны артқаны қуаныш болмағанымен, олардың аурудың алдын-алу бағытындағы жұмыстарды күшейтетіні көңілге медеу. Ендігісі, сала қызметкерлерінің антына адалдығы.
Р.САДУОВА
http://qyzylorda.info/index.php/densaulyq/item/1495-ant-a-adaldy-my-ty-densauly
